MEDICEA Familia

MEDICEA Familia

amplissime se in Italia diffudit, si, qui nomen idem gerunt, eiusdem etiam sanguinis haberi debent: nam praeter Florentinam domum, Mediolani, Veronae, Brixiae, Medicei vixêre. Inprimis vero in Tuscia floruerunt et plures ex illis in Florentina libera Republ. principatum gessêre, antequam Alexandrum nothum exque filia notha Margarita generum Carolus V. Imperatur devictae Urbi Ducem daret. Familiae conditor fuit Silvester Medices Mercator praedives et praecipuus Nobilitatis adversarius: cuius posteri indies auctis divitiis tandem plus quam regias sibi comparârunt opes et favore Populi ad summam potentiam ac dignitatem emerserunt. Cuius occasio Cosmi Medices exilium fuit. Hic enim, cum a factione Nobilium, iniquô iudiciô oppressus Urbeque pulsus esset, alterô statim annô a sua factione revocatus, Principem Rei publ. se, sed salvâ huius libertate constituit, et obscuram hactenus familiam Mediceam, ad illud fastigium evexit, in quo hodie par magnis Regibus versatur. Eius nepos Laurentius eâdem moderatione favoreque Populi, eandem dignitatem tenuit, nequiquam reluctantibus Optimatibus, usque ad A. C. 1492. quô una cum eo pax Italiae sepulta est, Filius postea Laurentii Petrus II. cum, preateritô Magistratu, clandestinam cum Carolo VIII. Rege Galliae transactionem iniisset, A. C. 1494. a Florentinis hostis Patriae iudicatus, excidit Principatu: duravitque haec Populi libertas, usque ad A. C. 1512. quô Medicei a Ferdinando Hispaniae Rege restituti sunt. Cum vero A. C. 1527. Roma o Carolo V, expugnata et ipse Clemens VII. Pontifex Petri praefati ex fratre nepos captus fuisset, Florentini denuo libertatem, auxiliô Gallorum, recuperârunt. Sed, Clemente Imperatori reconciliatô, Florentia Medrcsae familiae restituta est, A. C. 1530. Alexanderque Medices, a Carolo V. Dux creatus, A. C. 1535. Quô intra biennium sublatô, successit Cosmus. I. hodiernorum Magnorum Tusciae Ducum conditor, qui summâ prudentiâ Princeps Ducatum suum per universam late Hetruriam extendit, et A. C. 1569. a Pio V. Pontifice Rex, sed obtinente Maximilianô II. Magnus ab hoc Dux tituli permutatione, creatus est: a quo tempore Medicei dici coepêre Magni Duces Etruriae sive Tusciae, sive Florentiae. Originem hic Cosmus ducit a Iuliano Mediceo, Laurentii praefati fratre, et Petri I. filio, qui a Pactis occisus A. C. 1504. ex Catharina filia Galeacii Mariae Ducis Mediolanensis, reliquit filium Iohannem, qui obiit A. C. 1526, Huic Maria Salviata (filia Iacobi Salviati et Laurentiae, Laurentiô M. Mediceô, Principe Florentinô, genitae) genuit Cosmum I. Magnum Ducem Hetruriae defunctum. A. C. 1574. Quô, et Eleconorâ Toletanâ (filiâ Petri Alvari Ducis Toletani, Proregis Neapolitani) exstinctâ A. C. 1562. natus Ferdinandus I. obiit a. C. 1609. Pater, ex Christina Lotharingica (filia Caroli Ducis et Claudiae, Henricô II. Galliae Rege genitae) Cosmi II. qui decessit A. C. 1620. relictô ex Maria Magdalena Austriaca (filia Caroli Archiducis, Ferdinandô I. Imperatore geniti) Ferdinandô II. cui uxor Victoria de Rovier seu Roborea, haeres Ducatus Urbinatis,

utpote filia Friderici Ubaldi Roborei Ducis Urbini ultimi, exstincti A. c. 1623. peperit Cosmum (natum ac denatum A. C. 1639) Cosmum III. (natum 1642. et maritum Margaretae Ludovicae Aurelianensis, quae tamen eô relictô iamdudum in Gallia degit, insigni palatiô in loco Montmartre prope Lutetiam, exstructô) et Franciscum: e quibus Cosmus, Patri haud pridem defuncto successit. Vide Phil. Iac. Spenerum The. Part. I. p. 149.